ಬದಲಾವಣೆಯ ಕಾಲ ಸನ್ನಿಹಿತವಾಗಿದೆ

ಬದಲಾವಣೆಯ ಕಾಲ ಸನ್ನಿಹಿತವಾಗಿದೆ

 

                           ಹಾರುವೆನು ನಾನು ದಿಗಂತದೆತ್ತರಕೆ 

              ಸುತ್ತ-ಮುತ್ತಲಿನ ಮೌಡ್ಯದ ಸಂಕೋಲೆಯನು ಕಳಚಿ

                      ವಿನೂತನ ರೀತಿಯಲಿ, ಸ್ವತಂತ್ರವಾಗಿ

                              ಗುರಿ ಮುಟ್ಟುವ ದಿಶೆಯಲಿ

                            ಹಾರುವೆನು ನಾನು ದಿಗಂತದೆತ್ತರಕೆ

 

                                   ಹೆಣ್ಣಿರಲಿ, ಗಂಡಿರಲಿ

                           ಇಬ್ಬರಲ್ಲೂ ಸುಳಿವ ಆತ್ಮ ಒಂದೇ

                                       ಎಂತಿರುವಾಗ

          ಹೆಣ್ಣಿಗೆ ಮಾತ್ರ ಯಾಕೆ ಈ ಅನಿಷ್ಟ ಕಟ್ಟು-ಪಾಡುಗಳ ಕರ್ಮ? 

           

                      ದಿನ-ನಿತ್ಯ ಟಿ. ವಿ.ಯಲಿ ಕೇಳಿ ಬರುತಿದೆ

                                   ಜಗಜ್ಜಾಹೀರವಾಗಿ

                    ಹೆಣ್ಣಿನ ಮೇಲಿನ ಅತ್ಯಾಚಾರ, ಅನಾಚಾರ

                                        ದೌರ್ಜನ್ಯ

                              ಪಾಪಿಗಳ ಸ್ವೇಚ್ಚಾಚ್ಛಾರ

                               ಅಸಾಹಯಕರ ಆಕ್ರಂದನ

                                 ಏನೀದರ ಮರ್ಮ?

 

                                ಯಾಕೀ ವೈಪರಿತ್ಯ?

                            ಭೂ-ತಾಯಿ ನಲುಗಿಹಳು.

                   ಸಹನೆಯ ಕಟ್ಟೆಯೊಡೆದು ಸಹಿಸದಾದಾಗ

                                  ಸಾರುತಿಹುದು

                  ಕಾಲದ ಇನ್ನೊಂದು ತಿರುವು 'ಬದಲಾವಣೆ '

                                ಅವಶ್ಯ-ಅನಿವಾರ್ಯ

 

                             ಸರಕಾರದ ಹೊಸ ಹೆಜ್ಜೆ ,

                        ಜನತೆಯ ಒಗ್ಗಟ್ಟು ಸೂಚಿಸುವ -

                              ಮಾನವ-ಸರಪಳಿ

                      ಎಲ್ಲವೂ ಒಟ್ಟಾಗಿ ಅಡಗಿಸದಿಹರೇ

                        ಪಾಪಿಗಳ ಪೈಶಾಚಿಕ ಕ್ರೌರ್ಯ ?

 

                           ಭವಿಷ್ಯದ ಬದುಕಿನ ಭರವಸೆ

         ಯುವ ಪೀಳಿಗೆಯ ಹೆಣ್ಣು-ಮಕ್ಕಳಿಗೆ ನೀಡುತಿದೆ ಆಸರೆ

                 ಮೂರರಿಂದ ಎಪ್ಪತ್ತು ವಯಸ್ಸಿನ ವರೆಗೂ

          ಹೆಣ್ಣು ಪಡೆಯುತ್ತಿರುವ ಹೊಸ-ಶಿಕ್ಷಣ 'ಸ್ವ-ರಕ್ಷಣೆ '

 

                      ಗಂಡು ಮಕ್ಕಳಿಗೆ ದುಃಖವಾದಾಗ -

               ಹತ್ತಿಕ್ಕದೇ ಕಣ್ಣೀರಿನ ಮೂಲಕ  ಹೊರಹಾಕುವದು

               ತಾಯಿ ಕಲಿಸಬೇಕಾದ  ಇನ್ನೊಂದು ಹೊಸ-ಪಾಟ

                       ಈ ಎಲ್ಲ ಮಾರ್ಪಾಡು ಸಾರಿದೆ

                            ಬದಲಾವಣೆಯ ಕಾಲ ಸನ್ನಿಹಿತವಾಗಿದೆ

 

                ತಾಯ್ತಂದೆಯರ ಪ್ರೀತಿಯ ಆರೈಕೆಯಲಿ

                         ಸಹೋದರರ ಸಮನಾಗಿ

              ಅನಿಷ್ಟ ಅಂಧಾಚರಣೆಗಳ ಸರಣಿಯಿಂದಾಚೆಗೆ 

                                    ಹಾರ  ಬಯಸುವೆ ನಾನು

                     ಕೀಳರಿಮೆ ಬಿಟ್ಟು ಪಕ್ಷಿಯ ತೆರದಿ ಉತ್ತುಂಗಕೆ

                                ...  ಸಾರುತ್ತಾ.....

                         ಪರಿವರ್ತನೆ ಜಗದ ನಿಯಮ.

                                                             

                                                               Indu Naik