ಹೀಗೊಂದು ಪ್ರೇಮ ಕಥೆ-ಸಂಚಿಕೆ-೩

ಹೀಗೊಂದು ಪ್ರೇಮ ಕಥೆ

ಸಂಚಿಕೆ-೩

ಜ್ಯೋತಿಕಾಳ ಮದುವೆ ಬಂದೇ ಬಿಟ್ಟಿತು. ನನ್ನ ನೌಕರಿ ಕೆಲಸ ಬಿಟ್ಟರೆ ಮತ್ತೆಲ್ಲಿಯೂ ನಾನು ಒಂಟಿಯಾಗಿ ಹೋಗಲು ಇಷ್ಟ ಪಡುತ್ತಿರಲಿಲ್ಲ. ನನ್ನ ಪತಿಯ ಜೊತೆಗೆ ಹೊರಗೆ ಹೊಗುವುದೆಂದರೆ ನನಗೆ ಬಲು ಖಷಿ. ಆದರೆ ಇವರಿಗೆ ಮದುವೆ ಸಮಾರಂಭಗಳಿಗೆ ಹೋಗುವುದೆಂದರೆ ಎಲರ್ಜಿ. ಆದರೂ ಜ್ಯೋತಿಕಾಳ ಮದುವೆ ತಪ್ಪಿಸಲು ನನಗೆ ಇಷ್ಟವಾಗಲಿಲ್ಲ. ಹೋಗಲೇಬೇಕೆಂದು ನಿರ್ಧರಿಸಿದೆ.

ನನ್ನ ಪತಿ ಹೇಳಿದಂತೆ ಒಂದು ವೆಹಿಕಲ್ ಮಾಡಿಕಂಡು ನನ್ನ ಅಕ್ಕ-ಪಕ್ಕದಲ್ಲಿರುವ ಸಂಬಂಧಿಕರು ಹಾಗೂ ಸ್ನೇಹಿತೆಯರೊಡನೆ ಸಮುದಾಯ ಭವನದಲ್ಲಿರುವ ಕಲ್ಯಾಣ ಮಂಟಪದಲ್ಲಿ ನಡೆಯುವ ಮದುವೆಗೆ ಹೊರಟೆ.

 ಕಲ್ಯಾಣ-ಮಂಟಪದಲ್ಲಿ ಜನರು ಕಿಕ್ಕಿರಿದಿದ್ದರು. ಕುಳಿತು ಕೊಳ್ಳಲು ಜಾಗವಿರಲಿಲ್ಲ. ಅಲ್ಲೊಂದು ಇಲ್ಲೊಂದು ಕುರ್ಚಿ ಇದ್ದುದರಿಂದ ಎಲ್ಲರೂ ಒಟ್ಟಿಗೆ ಕುಳಿತುಕೊಳ್ಳಲಾಗಲಿಲ್ಲ.

 

ಅಲ್ಲಿ ವಧು-ವರರ ಹೆಸರನ್ನು ನೋಡಿ ನಾನು ದಂಗಾದೆ. ವಧುವಿನ ಹೆಸರು‘ಚಂದ್ರಿಕಾ’ ವರನ ಹೆಸರು ‘ಚಿದಾನಂದ’ ಎಂದಿತ್ತು.

 “ಏನಿದು,ಇಂದು ಜ್ಯೋತಿಕಾಳ ಮದುವೆಯಲ್ಲವೇ? ಯಾರನ್ನು ಕೇಳುವುದು? ಎಂದು ಪಕ್ಕಕ್ಕೆ ತಿರುಗಿದೆ. ಪರಿಚಿತಳಾದ ರೋಹೀಣಿ ಕಣ್ಣಿಗೆ ಬಿದ್ದಳು.

 ಅವಳನ್ನು ಕೇಳಿದಾಗ,“ಅಯ್ಯೋ ಮೇಡಂ,ನಿಮಗೆ ಗೊತ್ತಿಲ್ವಾ?  ಜ್ಯೋತಿಕಾ ಊರಿಗೆ ಬಂದು ಒಂದು ವಾರ ಆಯಿತು. ತನ್ನ ಮದುವೆಯ ಬಗ್ಗೆ  ಮತ್ತೆ ತಾಯಿಯ ಮನವೊಲಿಸಲು ಮನೆಗೆ ಹೋದಾಗ ಇವಳ ಮಾತನ್ನು ಕೇಳಲು ತಯಾರಿಲ್ಲದ  ತಾಯಿ ಇವಳ ತೋಳನ್ನು ಹಿಡಿದೆಳೆದು ಹೊಡೆಯುತ್ತಾ ಮನೆಯಿಂದ ಹೊರಗೆ ಹಾಕಿದ್ದಳಂತೆ ನಿನಗೂ ಈ ಮನೆಗೂ ಯಾವ ಸಂಬಂಧವೂ ಇಲ್ಲ ಎನ್ನುತ್ತ”.

ಇದನ್ನು ಕೇಳಿ ನನ್ನ ಕರುಳು ಚುರಕ್ ಎಂದಿತು. ತಾಯಿ ‘ಕ್ಷಮಯಾ ಧರಿತ್ರೀ’ ಎನ್ನುತ್ತಾರೆ. ಕ್ಷಮಾ ಗುಣ ಇರುವುದೇ ತಾಯಿಯಲ್ಲಿ.! ಈ ಮಾತಿಗೆ ಜ್ಯೋತಿಕಾಳ ತಾಯಿ ಅಪವಾದ ಎನಿಸಿತು . ಬೆಳೆದ  ಮಕ್ಕಳೊಂದಿಗೆ ಸ್ನೇಹಿತನಂತೆ ವರ್ತಿಸು ಎನ್ನುವುದೂ ಇವರಿಗೆ ತಿಳಿಯದಾಯಿತೇ?

“ಅದಾದ ನಂತರ ಜ್ಯೋತಿಕಾ ಶೇಖರ್-ದಂಪತಿಗಳ ಮನೆಯಲ್ಲಿ ಉಳಿದು ಕೊಂಡಳು ಮೇಡಂ. ಈ ದಿನ  ಹೆಣ್ಣಿನ ಮನೆಯ ಮದುವೆ -ದಿಬ್ಬಣ ಹೊರಟಿದ್ದೂ ಅವರ ಮನೆಯಿಂದಲೇ. ಅವರು  ತುಂಬಾ ಒಳ್ಳೆ ಜನ ನಿಮಗೆ ಗೊತ್ತಲ್ಲ ಮೇಡಂ.”  ಎಂದಳು.

ಶೇಖರ್-ದಂಪತಿಗಳು ಶ್ರೀಮಂತರಾದರೂ ಸೊಕ್ಕಿಲ್ಲದವರು. ದಯಾಳುಗಳು.

ಅಸಹಾಯಕರಿಗೆ ಸಹಾಯ ಮಾಡುವದರಲ್ಲಿ ಸಿದ್ಧ-ಹಸ್ತರು. ಅವರ ದೊಡ್ಡ ಗುಣಕ್ಕೆ ಮನಸ್ಸಿನಲ್ಲಿಯೇ ವಂದಿಸಿದೆ.

ರೋಹಿಣಿ ಅಷ್ಟಕ್ಕೇ ಸುಮ್ಮನಿರದೆ ಮಾತು ಮುಂದುವರೆಸಿದಳು.  ಜ್ಯೋತಿಕಾಳನ್ನು ಸಂಪೂರ್ಣವಾಗಿ ಸ್ವೀಕರಿಸಿದ ಗಂಡಿನ ಮನೆಯವರು ತಾವೇ ಖುದ್ದಾಗಿ ಮುಂದೆ ನಿಂತು

ಎರಡೂ ಕಡೆಯ ಖರ್ಚು-ವೆಚ್ಚ, ಉಟೋಪಚಾರ ಎಲ್ಲವನ್ನೂ ನೋಡಿ ಕೊಂಡಿದ್ದಾರೆ ಎಂದು

ತಿಳಿದಾಗ ಜ್ಯೋತಿಕಾ ಅದೃಷ್ಟವಂತೆ ಎನಿಸಿತು.

 ಅವಳ ಹೆಸರನ್ನೂ ಬದಲಾಯಿಸಿ ‘ಚಂದ್ರಿಕಾ’ಎಂದು ನಾಮಕರಣ ಮಾಡಿ ಆಮಂತ್ರಣ-ಪತ್ರಿಕೆಯಲ್ಲಿ ಹೆಸರನ್ನು ನಮೂದಿಸಿದ್ದಾರೆ ಎಂದು ಅರಿತಾಗ  ಗಂಡಿನ ಮನೆಯವರ

ದೊಡ್ಡ ತನಕ್ಕೆ ಹೆಮ್ಮೆಪಟ್ಟೆ.

ಮದುವೆಗೆ ಬಂದ ಜನ ಸಮೂಹದಲ್ಲಿ ಹೆಚ್ಚಿನವರು ಸುಶಿಕ್ಷಿತರೇ ಆಗಿದ್ದರು. ವಿವಿಧ ಇಲಾಖೆ-

ಯಲ್ಲಿ ನೌಕರಿ ಮಾಡುವವರು, ಉನ್ನತ-ಹುದ್ದೆಯಲ್ಲಿ ಇರುವವರು.

ಮಂಟಪದಲ್ಲಿ ಕುಳಿತ ಚಂದ್ರಿಕಾಳನ್ನ ನೋಡಿ , ರೋಹಿಣಿ ಮತ್ತೆ ಮಾತಿಗಾರಂಭಿಸಿದಳು.

“ ನೋಡಿ ಮೇಡಂ, ಹುಡುಗಿ ಮೂವತ್ತು ವರ್ಷ ಮೇಲ್ಪಟ್ಟವಳಾದರೂ ದಂತದ ಬೊಂಬೆಯಂತೆ ಕಾಣುತ್ತಿದ್ದಾಳೆ. ಹುಡುಗಿಯನ್ನು ಅವಳ  ಸಂಭಂದಿಕರು ಧಾರೆಯೆರೆದು ಕೊಡುತ್ತಿದ್ದಾರೆ.

 ಹುಡುಗ ನೋಡಿ ಮೇಡಂ, ನೋಡಲು ಸುಮಾರಾಗಿದ್ದರೂ ಒಳ್ಳೆಯ ಗುಣದವನಂತೆ. ಜ್ಯೋತಿಕಾಳನ್ನು ತುಂಬಾ ಪ್ರೀತಿಸುತ್ತಾನಂತೆ.

ಅಲ್ನೋಡಿ ಮೇಡಂ, ಹುಡುಗನ ಬದಿಯಲ್ಲಿ  ನೀಟಾಗಿ ಡ್ರೆಸ್ ಮಾಡಿಕೊಂಡು

 ಹೆಗಲ ಮೇಲೆ ಬಿಳಿದಾದ ಶಾಲ್ ಹಾಕಿಕೊಂಡು ನಿಂತವರು ಹುಡುಗನ ತಂದೆ. ಪಕ್ಕದಲ್ಲಿ ಹಸಿರು-ಕೆಂಪು ಬಣ್ಣದ ರೇಷ್ಮೆ ಸೀರೆಯುಟ್ಟು ನಿಂತವಳು ಹುಡುಗನ ತಾಯಿ. ಆ ಕಡೆ ಮೆರುನ್ ಬಣ್ಣದ ಸೀರೆಯುಟ್ಟು ಸುಂದರ  ಯುವತಿ ನಿಂತಿದ್ದಾಳಲ್ಲ  ಮೇಡಂ, ಅವಳು ಹುಡುಗನ ಅಕ್ಕ.  ಅವಳೂ ಇಂಜಿನಿಯರ್ ಅಂತೆ....ರೋಹಿಣಿಯ  ಮಾತು ಬ್ರೇಕ್ ಇಲ್ಲದೆ ಮುಂದೆ ಸಾಗಿತ್ತು.

ಒಂದು ಕ್ಷಣ ನಾನೂ ಯೋಚಿಸಿದೆ.

ಎಲ್ಲರೂ ಸಂತೋಷದಿಂದ ಈ ಮಂಗಳ ಕಾರ್ಯದಲ್ಲಿ ಭಾಗಿ ಯಾಗಿರುವಾಗ ಹುಡುಗ ಕೇವಲ ಪರ ಜಾತಿ ಎಂದು ಸಂಕುಚಿತ ಮನಸ್ಸಿನ ತಂದೆ-ತಾಯಿಗಳು ದೂರವಿದ್ದದ್ದು ಖಂಡನೀಯ. ಅವರಿಷ್ಟದಂತೆ ಮದುವೆ ಮಾಡಿದ್ದರೂ ಇಷ್ಟು ಒಳ್ಳೆಯ ಪತಿ ಚಂದ್ರಿಕಾಳಿಗೆ ಸಿಗುತ್ತಿರಲಿಲ್ಲ ಎನಿಸಿತು.

ಊಟಕ್ಕೆ ಕುಳಿತಾಗ ಹುಡುಗನ ಕಡೆಯವರು ಬಂದು “ನಿಧಾನ ಊಟಮಾಡಿ ”ಎನ್ನುತ್ತ  ಪ್ರತಿ

ಯೊಬ್ಬರನ್ನು ವಿಶ್ವಾಸದಿಂದ ವಿಚಾರಿಸಿಕೊಂಡರು. ತಾಂಬೂಲ ಉಡುಗೊರೆಯನ್ನಿತ್ತು ಸತ್ಕರಿಸಿದರು.

ಇನ್ನೇನು ಮನೆಗೆ  ತಿರುಗಿ ಹೊರಡಬೇಕು ಎನ್ನುವಷ್ಟರಲ್ಲಿ ಮತ್ತೆ ರೋಹಿಣಿ ಪ್ರತ್ಯಕ್ಷಳಾದಳು. ಮೇಡಂ, ತಪ್ಪು ತಿಳಿಯಬೇಡಿ, ಇನ್ನೊಂದು ವಿಷಯ ಹೇಳಲು ಮರೆತಿದ್ದೆ. ತಂದೆ-ತಾಯಿಯೇ ಮುಂದಾಗಿ  ನಿಂತು ಗಂಡು ನೋಡಿ ಮದುವೆ ಮಾಡಿದ ಶ್ವೇತಾಳನ್ನು ನೋಡಿದರೆ ಪಾಪ ಅನ್ಸುತ್ತೆ. ಮದುವೆಯಾಗಿ ಒಂದು ವರ್ಷವೂ ಸರಿಯಾಗಿ ಬಾಳ್ವೆ ಮಾಡಲಿಲ್ಲ.ಈಗ ಗಂಡ ಡೈವೋರ್ಸ್ ಕೊಟ್ಟಿದ್ದಕ್ಕೆ ತಾಯಿ ಮನೆ ಸೇರಿದ್ದಾಳೆ.” 

ಅವಳ ಮಾತಿಗೆ ನಾನು ಪ್ರತ್ಯುತ್ತರವಾಗಿ “ಹೌದೇ” ಎಂದು ಹುಬ್ಬೇರಿಸಿದೆ. ಅಷ್ಟೆ! ತಕ್ಷಣ ಅವಳು “ಬೇರೆಯವರ ಸುದ್ದಿ ನಮಗ್ಯಾಕೆ ಮೇಡಂ”ಎಂದು ಜಾಗ ಖಾಲಿ ಮಾಡಿದಳು.

 

ಮನಸ್ಸಿಗೆ ತುಂಬಾ ಕೆಟ್ಟೆನಿಸಿತು.ಮದುವೆಯ ನಂತರ ಚಂದ್ರಿಕಾ ಗಂಡನ ಮನೆಯಲ್ಲಿ ಎಲ್ಲರೊಡನೆ ಹೊಂದಿಕೊಂಡು ಖುಷಿಯಾಗಿದ್ದಾಳೆ ಎಂದು ತಿಳಿದಾಗ ಮನಸ್ಸು ಹಗುರವೆನಿಸಿತು.

ಒಂದು ಮಾತಂತು ನಿಜ.

ನಾಲ್ಕೈದು ವರ್ಷಗಳಿಂದಲೂ ತಂದೆ-ತಾಯಿಯರ ಅನುಮತಿಗಾಗಿ ಕಾಯುತ್ತ ಕೊನೆಗೂ ಅವರ ಅನುಮತಿ ಸಿಗದೆ ಇಷ್ಟಪಟ್ಟವನೊಡನೆ ಮದುವೆಯಾದ ಚಂದ್ರಿಕಾ ಅದೃಷ್ಟವಂತಳೆ ಸರಿ!

ತಾಯಿ-ತಂದೆಯರ ಇಷ್ಟದ ಪ್ರಕಾರ ನಡೆದು ಮದುವೆಗೆ ಒಪ್ಪಿಕೊಂಡ ಶ್ವೇತಾಳ ಜೀವನ ಏನಾಯ್ತು? ಗಂಡನಿಂದ ಡೈವೋರ್ಸ್!  ಪಾಪ ಶ್ವೇತಾಳಿಗೆ ಹಾಗಾಗಬಾರದಿತ್ತು. ನನ್ನ ಮನಸ್ಸು ವಿಲಿವಿಲಿ ಒದ್ದಾಡಿತು. ಇದೆಂತಹ ವಿಧಿ ವಿಪರ್ಯಾಸ!

                            

--------          ಮುಗಿಯಿತು--------           

 

 Indu Naik